СтIал Сулейманан шиирар

ТАПАН КОММУНИСТ

Инсанарин бязибуруз
КIанзавач инсанвал ийиз.
Гафар пара ширин къалуз,
Фикир туш хъсанвал ийиз.

Фагьумна за бязибур.
Кепекдих маса гуз абур,
Вичи вич кьаз лап такабур,
КIанзава уьзденвал ийиз.

Дамах жеда бязибуруг,
Ажуз кесиб кутаз хурук,
ГьакI кутаз масад къурхудик,
Падишагь, султIанвал ийиз.

Чидач инсанвилин къайда,
Уьмуьр ракъуз гьакI гьавайда.
Калхуз юлдашрин арада
ГатIуна шейтIанвал ийиз.

Юзуриз гагь-гагь пIузарар.
КIуф хъурез, экъисиз сарар,
Ажузбуруз гуз кичIерар,
Вичи гьакI уфтанвал ийиз.

Вич хинни яз, гъуьр хьиз акваз,
Яргъаалай фекъир хьиз акваз,
Вич са умун къуьр хьиз акваз,
Чинеба "асланвал" ийиз.

Гафар пара ширин къалуз,
Ришвет къачуз, руфун дулуз,
ТIвар вичин партийный лугьуз,
Куьгьне Мурсал-ханвал ийиз.

Эй Сулейман, са-сад,са-сад,
Кьулух тамир абурукай мад.
Регъуьн тавур къуьлуьн шагьад
Къачуз, регъуьхъбанвал ийиз.

1934 г.

ГЕРЕК ТУШ

Куьгьне замандин куьгьне
Фитнеяр кIватIун герек туш
Фагькмна, юлдашар, куьне
Бес я акI гатIун герек туш.

Вичин жендек ишлемишай,
Гьекь, гаф гьакI ракъуриз вичяй,
А инсан мал къазамишай
адан сес атIун герек туш.

Я пис тийижиз, я хъсан-
Кими жедач гьахьтин инсан,
Фагьум тийиз ужуз, масан,
Дуллух, къимет гун герек туш...

Гафар - чIалар виридан сад,
Къалай къуз чи гевил я шад.
Садаз виш артух я майишат
Адакай рахун герек туш.

1936